Osaka - Kyoto

Vöknuðum snemma morguns, sumir byrjuðu daginn á því að borða loðnu og makríl ásamt öðrum sjávarafurðum að hætti innfæddra, en flestir héldu sig við hefðbundin morgunverð.

Osaka-kastali var næstur á dagskrá - skoðunarferð farin í 17°C stiga hita og sól. Hápunktur ferðarinnar átti að vera bátsferð um síki Osaka. Með eftirvæntingu var beðið eftir ferjunni sem kom á áætlun og fór stuttu síðar nánast tóm.

Ferðin einkenndist af spennu farþeganna.

Gróðurfar Osaka-borgar mætti lýsa í hnotskurn sem kálhausum fljótandi á vatnsborði árinnar. Grænmetið er ekki einu sinni notað til manneldis og urðum við þar strax fyrir miklum vonbrigðum. Ekki bætti úr skák að ekkert var að sjá í allri ferðinni.

Næsti dagur var nokkru betri. Farið var til Kyoto og þar var fyrst að sjá þjóðlega japanska menningu (eitthvað annað en tölvur og farsíma). Þar var gamli tíminn alls ráðandi og fórum við að skoða Kiyomizu hofið. Það var tilkomumikið og allir höfðu gaman af.

Ferðin lá næst á Geishu-slóðir. Eftir stutt labb sáum við sannar "Geishur" (sjá mynd) skunda hjá, mitt í sauðsvörtum almúganum. Stelpurnar í hópnum urðu svo hrifnar af athygli þeirri sem þessar "Geishur" fengu, að þær stukku inn í næstu búð og fjárfestu í tilkomumiklum búningum að hætti Japana og notuðu við vinnu næsta dag. Vakti það lukku á meðal farþeganna þegar tekið var á móti þeim að Japönskum sið.

knús & kremja þangað til næst frá Hong Kong

Athugasemdir

[Kolbrún (IP-tala skráð) 11.11.2007 kl. 16:19]

Komið sæl og blessuð heimsfarar !!

Leitt með Osakaborg og gróðurfarið þar. Heyrist þetta samt vera hin mesta upplifun, og það verður örugglega gaman á næsta grímuballi þegar Geishur frá Japan mæta haha:).      Gangi ykkur allt í haginn áfram og góða skemmtun.                                                                             

Kv. Kolbrún systir Birgittu

[Ómar Guðnason (IP-tala skráð) 12.11.2007 kl. 14:19]

Hæ hæ heimsfarar! Gaman að fylgjast með ykkur á ferð ykkar um heiminn. Ég er staddur ásamt Einari Guðlaugs og Báru Oddgeirs í Salalah í Oman. Erum á frábæru hóteli við ströndina, þar sem að herbergið mitt er stærra en íbúðin mín á Íslandi. Við verðum hér í viku, og fljúgum svo til Stokkhólms og heim daginn eftir.

Vonandi verður ferðin hjá ykkur skemmtileg!

Bestu kveðjur til allra!

Ómar Guðnason

Ps. Jói og Kári, við sjáumst í des hjá Adda!!!

[Sara Regins (IP-tala skráð) 13.11.2007 kl. 12:41]

Hæ hæ! Ég varð að kvitta fyrir mig  ótrúlega gaman að fylgjast með ykkur í þessari svakalegu ferð og myndirnar eru alveg punkturinn yfir i-ið. Ég varð samt að segja það að ég hlakka mest til að heyra hvernig Íris Björk upplifir Kenýa. Njótið lífsins og ferðarinnar, passið vel upp á hvort annað.

Kær kveðja frá Íslandi í 5° hita, skýjuðu en logni, Sara Regins.