Toronto - Whitehorse, Yukon

Farþegarnir komu vel stemmdir til leiks í Toronto og við tókum á móti þeim með bros á vör. Allir voru mjög spenntir að leggja í þennan merkilega leiðangur og brottför frá Toronto gekk að óskum. 

Fimm og hálf klukkustund leið fljótt og var farþegum boðið upp á

margréttaðan hádegisverð ásamt tertum og tilheyrandi. Óbyggðir Kanada runnu framhjá og lending í Whitehorse var samkvæmt áætlun.

Whitehorse er gamall gullgrafarabær og gegndi stóru hlutverki sem þjónustu- og flutningamiðstöð í kringum aldamótin 1900 þegar gullæðið reið yfir. Allt yfirbragð bæjarins ber það með sér og myndir í albúminu okkar sýna glöggt hve bærinn er gríðarlega sveitalegur. Þó hér búi 21 þúsund manns, lítur út fyrir 20.800 séu einhvers staðar annars staðar en hérna. 75% íbúa Yukon búa samt hér.

Þeir sem muna eftir "Northern Exposure" þáttunum sem sýndir voru í Sjónvarpinu fyrir nokkrum árum, geta ímyndað sér hvernig hér er umhorfs.

Kvöldverður með farþegunum var góð byrjun á frábærri ferð og fengum við að bragða á vísundasteik eftir að hafa kynnt okkur fyrir farþegunum okkar.

Lagt af stað áleiðis til Osaka að morgni 6. nóvember. 

Athugasemdir

[Kári Kára (IP-tala skráð) 8.11.2007 kl. 08:14]

Við þetta er að bæta að "vísundasteikin" reyndist vera nokkurs konar hakkmeti og þótti kjet-ætunni í hópnum (Jóni) nóg um. Kallaði hann réttinn "Svikinn Vísund" enda minnti þetta óneitanlega mikið á svikinn héra eins og við þekkjum hann.

Til Osaka erum við komin og næsta færsla verður komin á netið seinnipart föstudags. Þangað til, hafið þið það gott og njótið lífsins.

Bestu kveðjur til allra.